काठमाडौं : पहिलो पटक घर खरिद वा निर्माण गर्ने व्यक्तिले कर्जा लिंदा निकै ठूलो राहत पाउने भएका छन् । केन्द्रीय बैंकले अबदेखि पहिलो पटक खरिद तथा निर्माण गर्ने व्यक्तिले धितो मूल्यांकनको ७०% सम्म कर्जा लिन पाउने व्यवस्था गरेको हो । घर खरिदमा सकेसम्म धेरै नेपालीको पहुँच विस्तार होस् भन्ने अभिप्रायले केन्द्रीय बैंकले नयाँ नीति अघि सारेको हो । यस व्यवस्थाबाट कर्जा लिएर घर बनाउनेलाई थप राहत मिल्नेछ ।
यसअघि राजधानीमा धितोको ५०% सम्म र उपत्यकाबाहिर धितो मूल्यांकनको ६०% सम्म घर खरिद कर्जा लिन पाइने व्यवस्था थियो । केन्द्रीय बैंकले एकीकृत निर्देशन २०७५ मा सशोधन गर्दै नयाँ नियम लागू गरेको हो । यो सुविधा पहिलो पटक घर खरिद वा निर्माण गर्नेले मात्र उपयोग गर्न पाउनेछन् । यसमा अधिकतम १ करोड ५० लाख रुपैयाँसम्म धितो लिन पाइनेछ ।
ऋणी आफूले मात्र प्रयोग गर्ने गरी अधिकतम ३ हजार वर्गफिटसम्मको घर वा अपार्टमेन्ट हुनुपर्नेछ । यो सुविधा प्रयोग गर्न यसअघि कुनै पनि बैंक तथा वित्तीय संस्थाबाट घर वा अपार्टमेन्ट खरिद तथा निर्माण गर्न कर्जा नलिएको हुनुपर्नेछ । बीचमा कर्जाको ब्यादर वृद्धि भए पनि पूर्वनिर्धारित मासिक किस्ता बढाउन पाइनेछैन । बरु कर्जा तिर्ने समय लम्बिनेछ । तर यस्तो सुविधा प्रयोग गर्दा घर भाडालाई भने ऋणीले आम्दानीको स्रोतका रुपमा देखाउन पाउने छैन ।
Source: http://www.nepalipaisa.com/NewsDetail.aspx/id/29231